Gara për kreun e FSHF-së sa vjen dhe bëhet më e nxehtë. Pas denoncimit të Bashkim Finos se po manipulohen zgjedhjet me anë të “shoqatave fantazmë”, që u pasua me një kallëzim në prokurori nga klubi i Flamurtarit kundrejt Federatës që drejtohet nga Armand Duka, tani vjen një deklaratë tjetër që rëndon skandalin. Shoqatës Sportive Minifutbolli Shqiptar ka dalë në deklaratë se FSHF është duke manipuluar zgjedhjet duke u hequr atyre të drejtën e votës edhe pse janë me të drejta të plota. Shoqata e Minifutbollit është zëvendësuar në listën e Asamblesë që do të votojë në 7 shkurt nga Shoqata e Futsallës, për interes të FSHF-së. Ja denoncimi i plotë i Shoqatës së Minifutbollit:
“Duke marrë shkas nga ngjarjet e fundit dhe përbaltja e emrit të Shoqatës Sportive Minifutbolli Shqiptar, është e dobishme që të sqarojmë rolin dhe vërtetësinë e shoqatës që përfaqësojmë. Shoqata e Minifutbollit Shqiptar, themeluar në vitin 2002 dhe anëtare e Federatës Shqiptare të Futbollit prej vitit 2002 e në vijim, një shoqatë që ka marrë pjesë në Asambletë e FSHF-së prej Asamblesë së vitit 2002 dhe që ka një aktivitet të suksesshëm prej vitesh. Shoqata Sportive Minifutbolli Shqiptar ka qenë dhe është gjithmonë aktive me aktivitete. Dashamirësit e sportit e dinë më së miri, sepse janë gjithmonë pjesëmarrës në aktivitet tona. Ata që as kanë marrë pjesë e as mbështesin, por vetëm pengojnë, janë zyrtarët e nëpunësit e FSHF-së.
Duam gjithashtu të theksojmë, në të kundërt nga sa flitet nëpër media, që: Shoqata Sportive Minifutbolli Shqiptar është regjistruar pranë Gjykatës së Rrethit Tiranë me vendim nr. 54, datë 26.10.2001. Me nr. llogarie pranë Banka Kombëtare Tregtare: 512000253clotclallxq. Me president z. Klodian KADIU. Shoqata e Minifutbollit Shqiptar vlerëson të shpërndajë këtë deklaratë për shtyp për të sqaruar situatën aktuale karshi Federatës Shqiptare të Futbollit dhe disa veprime dhe mosveprime të paligjshme të saj.
Shoqata e Minifutbollit Shqiptar i ka dërguar disa njoftime të protokolluara FSHF-së dhe së fundi edhe brenda afateve të përcaktuara statutore, në të cilin ka përcaktuar delegatin e saj në Asamblenë e FSHF-së. Përcaktimi i përfaqësuesit të çdo shoqate anëtare të FSHF-së është e drejtë e saj e pamohueshme dhe e patjetërsueshme. Këtë të drejtë të Shoqatës së Minifutbollit FSHF po tenton ta vjedhë. Nga ana e FSHF-së, ashtu siç është bërë publike këto ditë, po tentohet të manipulohen zgjedhjet dhe konkretisht të falsifikohet përfaqësimi i Shoqatës së Minifutbollit Shqiptar në Asamblenë e FSHF-së, duke përjashtuar përfaqësuesin legjitim të Shoqatës së Minifutbollit Shqiptar.
Një tentativë paraprake është bërë me heqjen e emrit të Shoqatës Sportive Minifutbolli Shqiptar nga lista e anëtarëve të asamblesë së FSHF-së, nga faqja zyrtare e kësaj të fundit. Diçka e pamundur në realitet, sepse Shoqata e Minifutbollit është anëtare me të drejta të plota, edhe pse në mënyrë mafioze, individë me poste drejtuese në FSHF kanë mundësuar falsifikime vulash e firmash e kanë bërë që persona pranë tyre të marrin pjesë në votime e jo përfaqësuesit e ligjshëm të Shoqatës së Minifutbollit. I bëjmë thirrje publike drejtueseve të FSHF-së të ndalojnë këto veprime të paligjshme, në të kundërt do të përballen me sanksionet ligjore përkatëse. I bëjmë thirrje FSHF-së dhe personave përkatës e të përfshirë në këtë vjedhje të rikthehen në ligjshmëri dhe të mos pengojnë përfaqësimin e anëtarëve të saj. I bëjmë thirrje FSHF-së të luajë “fair- play” dhe të mos njollosë këto zgjedhje, në rast të kundërt do të përballet me drejtësinë penale në Prokurori”./Telesport/
