Kandidati për kreun e Federatës Shqiptare të Futbollit, Bashkim Fino, ka thelluar më shumë skandalin e “shoqatave fantazmë”. Në rrjetin social Facebook ai ka publikuar një dokument, ku nga 8 e çon numrin në 12 të shoqatave që nuk janë të regjistruara dhe kanë votuar deri sot në zgjedhjet e FSHF-së. Dokumenti zyrtar i marrë nga Gjykata e Tiranës vërteton se Shoqata e Trajnerëve, Shoqata e Mjekëve Sportivë, Shoqata e Arbitrave të Futbollit dhe Shoqata e Futsallit nuk figurojnë të regjistruara.
Më parë Fino ka reaguar ndaj kundërshtarit të tij që ka 16 vite që drejton FSHF-në, për 8 shoqata fantazmë dhe ka paralajmëruar se çdo person që është përgjegjës për këtë shkelje dhe falsifikim do të përballet me ligjin.
Reagimi i plotë i Bashkim Finos:
Rëndohet skandali i FSHF, 4 Shoqata të tjera të pa regjistruara. Pas 8 Shoqatave Rajonale, që u faktuan ligjërisht se nuk janë të regjistruara në Gjykatë, sot jam tronditur kur kam mësuar në mënyrë zyrtare që nuk janë të regjistruara as 4 Shoqatat e tjera. Nëpërmjet vërtetimit nr. 156/1 Prot., i marrë nga Gjykata e Tiranës rezulton se nuk janë të regjistruara as Shoqata e Trajnerëve, Shoqata e Mjekëve Sportivë, Shoqata e Arbitrave të Futbollit dhe Shoqata e Futsallit. Ky është një skandal i paprecedentë i një Federate, e cila për vite me radhë ka mbyllur sytë para këtyre “ndërtimeve pa leje”, që i kanë zënë frymën futbollit shqiptar me ilegalitetin e tyre. Bashkim Fino
