Pavarësisht përpjekjeve nga ana e mjekëve, një 62-vjeçar nga Tirana ka humbur jetën nga COVID-19. Ai nuk vuante nga sëmundje bashkëshoqëruese, ndërsa kishte rreth dy javë që ishte shtruar në spital.
“Rreth dy javë pas shtrimit në spital, pas 10 ditësh në terapi intensive, i intubuar, një 62 vjeçar nga Tirana ka humbur jetën nga COVID19, megjithë përpjekjet e mjekëve, terapisë medikamentoze intensive, pavarësisht se nuk vuante nga sëmundje bashkëshoqëruese.
Ministria e Shëndetësisë i shpreh ngushëllime familjes së të ndjerit, dhe i rikujton qytetarëve rëndësinë që ka respektimi i masave mbrojtëse, pasi referuar ekspertëve të Institutit të Shëndetit Publik, virusi është prezent, ka transmetueshmëri dhe nuk e ka humbur forcën e tij virusale”.
Nga fillimi i epidemisë, 45 qytetarë e kanë humbur betejën me COVID-19. Aktualisht janë të shtruar mbi 80 pacientë në shërbimin infektiv, dhe janë mbi 790 raste aktive me COVID-19 në vend.
