Një javë para vizitës zyrtare të Vuçiç në Tiranë, kanë nisur të mbahen edhe takimet e fshehta mes Ramës dhe Hashim Thaçit. Presidenti i Kosovës, Hashim Thaçi është parë mbrëmjen e djeshme në rrugët e kryeqytetit, ku pas një shëtitje mësohet se është takuar me kryeministrin Rama, në një nga restorantet në zonën e Bllokut.
Kujtojmë këtu faktin se vizita në fjalë vjen vetëm një javë para vizitës së presidentit serb Aleksandar Vuçiç në Tiranë, e cila është parashikuar që të mbahet në datat 7 dhe 8 Mars.
Vizita e kreut të shtetit serb do zhvillohet në kuadër të punimeve të Samitit të Brdo-Briunit, ku nuk do të lejë pa prekur dhe çështjen e ndryshimit të kufijve, që përflitet se ka për kumbar Edi Ramën. Vizita e Thaçit nuk është aspak e rastësishme, në një kohë ku vëmendja në Shqipëri është zhvendosur tërësisht tek kriza politike, me një opozitë që ka braktisur Kuvendin.
