Ngritja e akuzës së Gjykatës Speciale ndaj presidentit të Kosovës, Hashim Thaçi, vetëm tre ditë përpara fillimit të dialogut me Serbinë, në Shtëpinë e Bardhë, është komentuar gjerësisht si në Kosovë e po kështu edhe në Shqipëri.
Thaçi ka ndërruar foton e Facebook-ut, duke vendosur emblemën e UÇK-së. Në përshkrim ai shkruan: “Askush nuk mund ta rishkruajë historinë e Kosovës!”.
Zyra e Prokurorit të Specializuar, me anë të një njoftimi për media, bënte me dije se më datë 24 prill kanë dorëzuar në Dhomat e Specializuara një aktakuzë me dhjetë pika për shqyrtim prej Gjykatës.
Në këtë njoftim thuhet se presidenti i Kosovës, Hashim Thaçi dhe kreu i PDK-së, Kadri Veseli akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura.
