Presidenti i Kosovës Hashim Thaçi përgjatë një konference për shtyp rrëfeu detaje nga vizita e tij në Shtetet e Bashkuara të Amerikës.
Ndër të tjera Thaçi deklaroi se në selinë e departamentit të shtetit i kanë ofruar qindra miliona dollarë investim në Kosovë, “sapo të arrihej marrëveshja me Serbinë”.
“Në këtë kohë kisha planifikuar që të jem në sallë të kuvendit, por në pamundësi që t’ju drejtohem përmes Kuvendit, më lejoni që t’ju drejtohem përmes kësaj konference.
Çështja të cilën do të informoj ndoshta është më e rëndësishmja për Kosovën në këtë fazë të konsolidimit të shtetit, e kam fjalën për angazhimin e Kosovës e miqve tanë amerikanë për mendësinë e arritjes së paqes përfundimtare Kosovë – Serbi, për procesin e mundësisë për marrjen e njohjes nga Serbia të anëtarësimit të Kosovës në organizatën e kombeve të bashkuara dhe hapjen e perspektivës së sigurtë për Kosovën që sa më shpejt të bëhet anëtare e NATO’s.
Vizita ka filluar në takimet më me ndikim në Washington. Kam treguar për përpjekjet e Kosovës për paqe.
Kemi diskutuar për siguri, për rolin e SHBA-së dhe Kosovën si aleati më besnik i Shteteve të Bashkuara të Amerikës. Në të njëjtën kohë në një darkë zyrtare ku ishin ftuar zyrtarë të ngarkuar të administratës së SHBA-së, por edhe ekspertët tjerë kemi diskutuar për të gjitha zhvillimet në vend.
Në të gjitha këto takime kam theksuar rolin e pazëvendësueshëm të SHBA-së për paqe dhe stabilitet në Ballkan edhe në tërë Evropën.
Kam pasur takime edhe me përfaqësuesit e administratës së SHBA-së, në Pentagon jam pritur nga Sekretari i Mbrojtjes, me të cilin kemi diskutuar për të arriturat e Ushtrisë së Kosovës e që Kosova të jetë sa më parë në NATO, dhe të pajiset me standarde të NATO-s.
Kemi marrë mbështetje të plotë për aspiratën tonë për ushtrinë dhe lëvizjen drejtë programit për paqe si parakusht për antarësimin në NATO.
Takim jashtëzakonisht i rëndësishëm ishte pritja nga sekretari Pompeo, në një takim sy më sy, sekretari Pompeo shprehu mbështetjen e plotë të SHBA-së për të arriturat e Kosovës. U pajtuam se kemi marrëdhënie të shkëlqyera dhe nuk kemi marrëdhënie të hapura.
Në selinë e departamentit të shtetit më kanë treguar edhe për qindra milionë dollarë të gatshëm për investim në Kosovë porsa të arrihet marrëveshja mes Kosovës dhe Serbisë”, tha Presidenti i Kosovës, shkruan “gazetaexpress”.
