Presidenti i Kosovës Hashim Thaçi foli mbrëmjen e sotme në emisionin “Opinion”, për takimin Kosovë-Serbi që do zhvillohet në Washington më datë 27 Qershor.
Takimin mes përfaqësuesve të Kosovës dhe Serbisë në Washington, Thaçi e cilësoi një mundësi të artë për të dy vendet:
“Ky takim do të mund të jetë një mundësi e artë për Kosovën dhe Serbinë që të punojnë për gjetjen e një zgjidhjeje përfundimtare… e rëndësisë jetike për të mirën e popujve, paqen dhe stabilitetin në Ballkanin Perëndimor.
Ne shkojmë me objektiva shumë të qarta në realizimin e synimeve që kemi patur dhe me një proces që do të mbyllet me anëtarësimin në OKB apo njohjen reciproke.
Kryefjala është që takimi do të jetë në kuadër të kornizave të Ahtisarit. Pres për t’u konkretizuar ky takim në marrëveshje mes dy shteteve sovrane.
Është një armiqësi më shumë se shekullore dhe do të jetë një takim rraskapitës.
Në Serbi jetojnë me të kaluarën dhe fare pak mendojnë dhe punojnë për të ardhmen.
Palët ulen të barabarta në Washington. Ne shkojmë me flamurin e integritetit territorial të Republikës së Kosovës dhe është një mundësi e mirë të punohet për marrëveshje”.
