Teuta e ka nisur në mënyrën më të keqe të mundshme fazën e parë eleminatore të Champions League. “Djemtë e Detit” të drejtuar nga Edi Martini, u mposhtën me rezultatin 0-4 nga Sherifi i Tiraspolit, në sfidën e zhvilluar në “Niko Dovana”.
Miqtë nga Moldavia e dominuan ndeshjen që nga minuta e parë dhe deri në të fundit, teksa golin e avantazhit e gjetën në minutën e 15-të.
Dyfishimi do të vinte në minutat shtesë të pjesës së parë, ndërsa në të dytën miqtë do të shënonin edhe dy herë të tjera për të vulosur rezultatin.
Sfida e kthimit mbetet thjesht një formalitet për sa i përket kualifikimit. Tashmë objektivi i Teutës, do të jetë që të shmangë një goleadë të turpshme.
