Në sallën e Albanologjisë, në Pallatin e Kongreseve po mbahet aktualisht prezantimi i platformës së aplikimit online për qytetarët që përfitojnë nga programet e rindërtimit.
Kryeministri Edi Rama gjatë fjalës së tij, theksoi se 95% e familjeve të prekura nga tërmeti do të marrin shtëpi më të mira.
“Bëhen 2 muaj fiks nga tragjedia e tërmetit që goditi vendin. Ky është një moment jetik për familjet dhe historik për qeverisjen. Nuk duam të lemë vetëm askënd që është prekur nga tërmeti. Për të rindërtuar nuk mund të sillemi si ata që ndërtuan pa leje. Ne kemi nevojë të planifikojmë në bazë të ligjit dhe komponentëve teknike.
Procesi është kompleks, nuk mund të ndiqet nga kafeneja. Janë identifikuar në kohë rekord zonat e rindërtimit. Nuk duam të bëjmë një rindërtim për t’u kthyer siç ishte zona. Në 95% të rasteve ata që u dëmtuan do të marrin shtëpi më të mira. Do të ndërtojmë shtëpi që do të bëjnë diferencë me të shkuarën”, deklaroi Rama.
