Pasojat e tërmetit të 26 nëntorit duken se nuk kanë të mbaruar. Ngjarja tragjike që tronditi Shqipërinë dy javë më parë duket se do të ketë ndikim të madh edhe në sektorin e turizmit.
Dihet që Plazhi i Durrësit është një nga pritësit më të mëdhenj të turistëve në vend, të cilët vijnë të organizuar përmes agjencive në Shqipëri.
Në një prononcim për Top Channel, Besnik Vathi që përfaqëson një nga tour-operatorët më të mëdhenj thotë se ka pasur anulime për grupet që do të kalonin vitin e ri në hotelet e Durrësit. Ndërsa sipas tij, për sezonin e verës do të vijnë agjente nga jashtë për të verifikuar situatën.
Nga ana tjetër, eksperti i ekonomisë, Adrian Civivi shprehet se ekonomia është psikologji dhe në këto kushte do të prekte dhe sektorin e turizmit në vitin e ardhshëm. Për të shpëtuar sezonin turistik tour-operatorët kërkojnë riparimin sa më shpejt të dëmeve në hotele, lehtësira fiskale dhe certifikim sizmik të ndërtesave pritëse.
