Nga tërmeti shkatërrimtar rënë një ditë më parë në Turqi, bëhet me dije se ka shkuar në 24 numri i viktimave dhe në 800 numri i të plagosurve. Ky është bilanci i viktimave dhe të plagosurve si pasojë e tërmetit me madhësi 6.6 rihter që goditi Turqinë.
Lëkundjet e tërmetit u ndien deri në Greqi, ku si pasojë humbën jetën 2 persona dhe 9 të plagosur. Mes të plagosurve ishte dhe 14-vjeçari shqiptar nga Lezha dhe një 63-vjeçare. Tërmeti me magnitutë 6.6 të shkallës rihter ka rënë në detin Egje në orën 12:51, 19 kilometra nga ishulli grek i Samos dhe shumë afër nga qyteti i Turqisë, Izmiri.
Inxhinierja e njohur, Luljeta Bozo, tërmetin e ndodhur në Turqi e lidh me një faktor zinxhir efektesh nën tokë. Profesoresha gjatë intervistës në ‘Euronews Albania’, tha se nuk ka arsye që të panikosen qytetarët në vendin tonë.
“Është një fenomen periodik që ndodh për shkak të reaksioneve të mëdha, që çlirojnë energji në brendësi të rruzullit tonë tokësor, dhe që gjejnë momentin për t’u çliruar në periudha të caktuara kohore.
Ka 5 vjet që ka filluar të çlirohet kjo energji, që nga jugu i Italisë dhe Spanjë, pastaj ka vazhduar në Greqi, erdhi këtu në Shqipëri që morëm goditjen në shtator dhe nëntor, dhe tani vazhdon poshtë në Turqi, aty ku është kufiri ndarës mes pllakës afrikane dhe pllakës euro-aziatike”, tha ajo.
Profesoresha qetësoi qytetarët se nuk duhet të tremben, duke thënë se tërmeti është fenomen gjeofizik dhe jo virus.
“Frikë nuk duhet të kenë njerëzit, pasi panë këtë ngjarje dhe tërmetin 2.8 magnitudë që kanë parë në vendin tonë. Krijohet ky paniku që meqë ra në Turqi mund të bjerë dhe këtu. Nuk është si COVID-19 që përhapet. Nuk është virus, është fenomen fizik i cili ka kohën e vetë”, tha ajo.
Inxhinierja duke iu referuar studimeve, ka zbuluar edhe kohën kur Shqipëria është e rrezikuar nga një tjetër tërmet i fortë si ai i vitit të kaluar. “Nga studimi i kryer pas tërmetit të 1979 në Mal të Zi, 6.9 magnitudë u bë një studim, mund të përsëritet në një periudhë kohore 35-40 vjet dhe faktikisht vajti 40 vjet fiks. Kjo do të thotë se një tërmet tjetër si ky i nëntorit do të kemi pas 35-40 vjetësh me afërsi”, tha ajo.
Nga ana tjetër, znj. Bozo shtoi se “njerëzit duhet të jenë të përgatitur për dy gjëra, e para jemi zonë sizmike dhe do të kemi gjithmonë tërmet, jo kaq të fuqishme sepse që të çlirohet kjo energji do një periudhë kohore që të akumulohet. E dyta, ka shumë rëndësi që të dimë ku të ndërtojmë dhe si të ndërtojmë. Tërmetin nuk e kemi në dorë, ndërtimet po”.
