Profesori grek i gjeologjisë, Spiros Pavlidis shprehet se dëmet që shkaktoi tërmeti i 26 nëntorit mund të ishin më të pakta nëse Shqipëria do të kishte përgatitur dhe adoptuar një rregullore të ngjashme me Greqinë.
Në një intervistë dhënë për gazetaren Ira Londo të “News24”, Pavlidis theksoi se Shqipëria është një nga zonat me aktivitet të lartë sizmik. Ndërsa bëri thirrje që pasojat e kësaj tragjedie të mos anashkalohen nga autoritetet. Por të reagojnë menjëherë e të marrin masa për të minimizuar dëmet që mund të shkaktojnë lëkundjet sizmike.
“Objektivi i rregullores antisizmike dhe e studimeve të zonave mikrosizmike, është të kemi minimalizim të dëmeve. Është thuajse e pamundur të eliminohen dëmet pasi atëherë do të kishim ndërtesa jo-ekonomike. Por mund të minimizojmë të kemi dëme sa më të vogla, që ndërtesat të mos bien, të mos shkatërrohen, të mos ketë viktima e të lënduar, dëmet të jenë të riparueshme.
“Unë e dua shumë popullin shqiptar dhe jam i bindur që do e tejkalojë këtë situatë. Por duhen masa e reagim, shkencëtarët tuaj e pastaj pushteti lokal. Mos prisni nga politikanët vetëm, bazohuni tek fuqitë tuaja, mos e lini të harrohet. Shërbimet kompetente të marrin masa mbrojtëse, të krijojnë sisteme mbrojtëse të posaçme. Por kurrë mos harroni”, tha profesori grek.
