Kryetari i Bashkisë Kolonjë, Erion Isai, ka komentuar protestën e banorëve të Qafëzezit, të cilët akuzuan bashkinë se shtëpitë që po rregullohen pas tërmetit të muajit qershor, po përzgjidhen nga bindjet politike. Kujtojmë këtu faktin se banorët e Qafëzezit kanë protestuar sot, pasi akuzojnë bashkinë e Kolonjës se shtëpitë e zgjedhura për t’u rregulluar nga tërmeti, janë zgjedhur në mënyrë partiake.
I pyetur nga mediat, Isai ka thënë se pretendimet e tyre janë të padrejta. Ai ka bërë me dije se ka nisur puna intensive për 2 banesat më problematike, dhe se 20 të tjera do të rikonstruktohen.
“Pretendimet e banorëve janë të padrejta. Ka nisur puna në 2 banesa nga 4 më problematiket në fshat. 4 banesa do të ndërtohen nga e para dhe 20 të tjera do të rikonstruktohen.
Ndërsa 246 shtëpi janë me dëme të lehta në gjithë Kolonjën, të cilat do të trajtohen me dëmshpërblim. Banorët të cilët jetojnë në banesat e të afërmve, do marrin statusin e të pastrehëve nga Bashkia Kolonjë dhe do të përfitojnë bonus qiraje nga bashkia”, ka thënë Erion Isai.
