Tërmetet e njëpasnjëshme në qarkun e Korçës kanë lënë në qiell të hapur disa familje, të cilët po qëndrojnë prej ditësh në çadra.
Banorët kërkojnë shpalljen e gjendjes emergjente nga shteti, ndërsa situata ka irrituar edhe personazhe publikë.
I tillë është këngëtari korçar Stefi Prifti, i cili shprehet se “shqiptarët janë shumë të ndjeshëm kur ndodhin fatkeqësi në botë, dhe ndryshe tregohen kur ndodhin në vendin e tyre.”
Reagimi i plotë:
Ne shqiptarët jemi shumë të ndjeshëm kur ndodhin fatkeqësi natyrore në Europë, Amerikë dhe nëpër botë, por çuditërisht kaq menefregistë dhe të pandjeshëm në këto tërmete-tragjedi natyrore, që kanë venë në vështirësi ekstreme shumë familje, fëmijë e të moshuar në krahinën e Korçës tonë!
Ku është solidariteti mbarë shqiptar për të ndihmuar zonën e Korçës dhe rrethinat e saj? Mesa kuptoj, ne jemi më të ndjeshëm me fatkeqësitë e të tjerëve, (nuk lëmë foto e flamuj pa nxjerrë…), se të shohim një krahinë të vendit tonë duke vuajtur!
Të paktën, jepini rëndësinë e duhur shpërndarjes se këtij fakti dhe thirrjes për ndihmë.
