Prej kohësh mazhoranca aktuale po paraqet krijimin e strukturave të reja të drejtësisë shqiptare si produkt ekskluziv të saj, duke paraqitur si rezultat spektakolar ndryshimet kushtetuese të Reformës në Drejtësi. Në fakt, gjithçka që nga financimi, hartimi i ligjeve dhe mbështetja me resurse humane kanë firmën e SHBA dhe BE.
Mund të kujtojmë ligjin paçavure të bërë nga qeveria për Byronë Kombëtare të Hetimit, të cilën e vunë nën dispozicion të ministrit të Brendshëm, Saimir Tahiri. Pra i varën ne qafe mëlçitë ujkut. Këtë ligj e rrëzuan menjëherë amerikanët të cilët nuk e lanë sistemin antikorrupsion në krijimin e një strukture që do të monitorohej nga qeveria, por bënë një qilizëm të thellë në gjithë sistemin e drejtësisë në Shqipëri.
Paketa e re përfshiu sistemin e Vettingut me dy struktura, KPK dhe KPA, struktura që kanë spastruar në qelizë Gjykatën Kushtetuese dhe Gjykatën e Lartë dhe po spastrojnë Prokurorinë në çdo nivel dhe qark, ndërkohë që tani fillon dhe spastrimi në qelizë i dy strukturave të tjera, Gykatës së Apelit dhe Gjykatave të Faktit. Paralel me këtë po ngrihet struktura e posaçme SPAK e cila ka në brendësi Gjykatën Speciale dhe Prokurorinë Speciale, të cilat në shërbim të tyre do të kenë Byronë Hetimore, e cila do të anashkalojë policinë gjyqësore që varej nga qeveria. Në të njëjtën kohë sistemi i drejtësisë ka tre struktura të reja që janë, KLP përzgjedhëse të prokurorëve dhe KLGJ dhe KED përzgjedhëse të gjyqtarëve. Pra kemi një transformim total të sistemit të drejtësisë në Shqipëri, i cili është mina me sahat për politikën shqiptare.
Të gjithë këto struktura janë nën monitorim të ONM, i cili është një bord i përbërë nga personalitete në fushën e jurisprudencës botërore dhe nuk kanë asnjë ndikim nga politika shqiptare. Përpos të gjithave strukturat e reja të krijuara përveç mandateve të gjata dhe pagave të larta nuk kanë asnjë ndikim nga politika shqiptare.
Që në ditët e para të hartimit të ligjeve dhe strukturave të reja të Reformës në Drejtësi, të dyja krahët e politikës u munduan të shtrijnë ndikimin e tyre në ligjet apo dhe strukturat që do të krijoheshin.
Ishin SHBA dhe BE që vendosën veton dhe i vunë në rresht për një të gjithë deputetët shqiptarë për të votuar në një farë mënyre dënimin e tyre me vdekje politike. Nga ai moment deri më sot gjithë merita mbetet ekskluzivë absolute e SHBA dhe BE.
Duke qenë se kjo reformë ka krijuar imunitet për organet e reja në luftën antikorrupsion, ndikimi për imunitet nga politika e të dyja krahëve është zero absolute.
SPAK dhe byroja hetiomore tashmë i kanë dosjet e rekordeve të politikanëve që kanë administruar fondet publike. Janë dhjetëra politikanë, zyrtarë të lartë që sot janë në opozitë të cilët kanë kryer korrupsion galopant, ashtu siç edhe në mazhorancën e sotme.
Dihet mirë që Gërdeci ka për autorë Sali Berishën, të birin, Fatmir Mediun, rruga Durrës-Kukës ka Lulzim Bashën dhe gjithë qarkun e tenderuesve lista me koncencionet dhe tenderët abuzivë vazhdon me Ridvan Boden, Arben Imamin, Genc Rulin,Genc Pollon, Ilir Metën etj, për të cilët prokurorët politikë kanë bërë mbylljen e dosjeve.
Por mund të vazhdohet më së miri me qeverinë aktuale ku nuk harrohen koncencionet skandaloze të Vilma Nushit dhe Klodian Allajbeu që kanë marrë respektivisht koncencionet e check up dhe hemodializës nga ministri Ilir Beqja dhe zëvendësministrja Milva Ekonomi.
Koncencionet skandaloze të rrugëve me cmime marramendëse të dhëna nga Damian Gjiknuri, abuzimet e Albpetrolit të denoncuara nga KLSH, impiantet e përpunimit të plehrave në Elbasan dhe Fier e shumë e shumë denoncime të KLSH, tenderi i unazës së Tiranës, ligji për prishjen e Teatrit Kombëtar të cilat janë brumi i punës së SPAK në fillim të nëntorit të këtij viti.
Pra nga sa thamë më sipër, Reforma në Drejtësi është produkt amerikan që ka për qëllim të sjellë një performancë të re në politikën dhe shtetin shqiptar. Nuk ka vend për pesimizëm në drejtim të Reformës në Drejtësi. Frutet e saj janë evidente. Janë rrafshuar dy gjykatat kryesore dhe gati 60 përqind e të vetuarve nga KPK dhe KPA. Kjo vjeshtë e re do të jetë një tërmet në politikën shqiptare dhe do pasohet me viktima të shumta të rëna nga korrupsioni galopant. /Gazeta SOT
