Blutë e Vlorës prangosën 39-vjeçarin Gazmend Merkaj, pasi kanosi me hanxhar vëllanë e tij. Ngjarja e rëndë ka ndodhur në lagjen “24 Maji”, në Vlorë në ambientet e banesës, ku 39-vjeçari i identifikuar ushtroi dhunë fizike dhe kanosi me mjet prerës vëllain e tij.
39-vjeçari nuk është një emër i panjohur për blutë e Vlorës. “Shërbimet e Komisariatit të Policisë Vlorë, pas njoftimit se në lagjen “24 Maji”, në ambientet e banesës, shtetasi G. M. kishte ushtruar dhunë fizike dhe po kanoste me mjet prerës (hanxhar) vëllanë e tij, menjëherë kanë shkuar në adresën e dhënë, duke parandaluar përshkallëzimin e mëtejshëm të dhunës dhe ngjarjen e mundshme. Punonjësit e Policisë së Patrullës së Përgjithshme kanë bërë të mundur neutralizimin dhe prangosjen e shtetasit G. M., në banesë”, njoftoi policia.
Gazmend Merkaj, është i riu që guxoi dhe tregoi disa prej krimeve të rënda në Vlorë, siç ishin rrëmbimet deri dhe në vrasje, dhe u dënua dy vite më parë nga Gjykata e Fierit për akuzën e “Armëmbajtjes pa leje”.
Gazmend Merkaj, para dy viteve u dënua nga gjykata e Fierit me 3.4 vite burg për akuzën e “Armëmbatjes pa lejë”. Merkaj u vetëparaqit në 1 gusht 2018 në policinë e Vlorës pas frikës se mund të ekzekutohej nga disa persona në Vlorë, që ai i njihte dhe i kishte bashkëpunëtorë. Por teksa është vetëparaqitur me qëllimin për të treguar disa prej krimeve në Vlorë, i riu ka dorëzuar në ambientet e Policisë së Vlorës dhe një armë që e mbante pa leje. Për këtë armë, prokuroria e Fierit nisi në muajin gusht një hetim, ndërkohë hetimet për rrëfimin e krimeve në Vlorë, e morën në dorë prokurorët e Vlorës. Por teksa në Vlorë rrëfimi i të penduarit solli dy të ndaluar nga prokuroria dhe disa persona të vrarë mes bandave rivale, në Fier, prokuroria e këtij qyteti mori të pandehur Gazmend Merkaj, dhe çështjen kundër tij e dërgoi për gjykim.
