Shefi i Lartë për Politikë të Jashtme të BE-së, Josep Borrell, ka reaguar me anë të një postimi në Twitter, lidhur me incidentet e sotme në veri të Mitrovicës, ku policia e Kosovës po zhvillonte një aksion kundër kontrabandës së mallrave.
Ai ka shkruar se incidentet e dhunshme në veri të Kosovës, duhet të ndalen menjëherë. Borrell i ka konsideruar si të papranueshme veprimet e njëanshme dhe të pakoordinuara, që rrezikojnë stabilitetin. Gjatë aksionit të sotëm në veri, policia është sulmuar nga serbët lokalë me gur, gaz lotsjellës e mjete të tjera. Gjashtë pjesëtarë të policisë janë lënduar, ndërsa tetë persona janë arrestuar.
“Incidentet e dhunshme në veri të Kosovës, duhet të ndalen menjëherë. Veprimet e njëanshme dhe të pakoordinuara që rrezikojnë stabilitetin, janë të papranueshme. Të gjitha çështjet e hapura duhet të adresohen përmes dialogut të lehtësuar nga BE. Ne jemi në kontakt me Beogradin dhe Prishtinën”, ka shkruar Borrell.
