Dita e tretë e protestës për vrasjen e 25-vjeçarit, Klodian Rasha është shoqëruar sërish me tensione midis protestuesve dhe forcave të policisë.
Teksa ishin grumbulluar tek Sheshi Skënderbej, ndaj të rinjve është hedhur gazlotsjellës, ndërsa një prej tyre është qëlluar me grushta nga policia.
Megjithatë, qytetari nuk bëri rezistencë dhe u shoqërua nga uniformat blu për në komisariat.
Të tjerë protestues u afruan tek kryeministria dhe në Bulevard dhe goditën policët me gurë e shashka, por u pritën me autobotin me ujë dhe me gazin lotsjellës.
Në këtë protestë të tretë, ata kërkojnë largimin e drejtorit të Policisë së Shtetit, Ardi Veliu, edhe pse kryeministri Edi Rama e ka thënë shkurt dhe qartë që një gjë e tillë nuk do të ndodh, duke shtuar se akti i dorëheqjes së ministrit Lleshaj nuk duhet marrë si dobësi e Shtetit.
