Seanca e sotme e parlamentit ka vijuar me përplasje dhe tensione. Pas fjalës së deputetit Ralf Gjoni, në foltore doli zv.kryeministri Erion Braçe, i cili i kërkoi shpjegime parafolësit të tij në lidhje me deklaratat e tij.
Referuar fjalës që Gjoni mbajti, Brace e pyet atë se çfarë i ka vjedhur.
“Çfarë të kam vjedhur unë ty, ça të kam vjedhur unë ty?!”, tha Braçe.
Pas fjalës së zv.kryeministrit, Gjoni ka kërkuar të drejtën e replikës por nuk iu dha, teksa fjalën në foltore e mori ministri Eduart Shalsi. Mirëpo duket se deputeti nuk e ka pranuar këtë refuzim dhe ka vrapuar për në foltoren e Kuvendit, duke marrë mikrofonin për t’iu përgjigjur Braçes.
Ralf Gjoni kërkoi të merren masa ndaj Shalsit dhe Braçes, pasi sipas tij, ata e kanë ofenduar me shenja fyese.
“Unë nuk fyeva asnjë person me emër dhe iu përmbajta rregullores. Ndaj meje si deputet janë përdorur shenja fyese dhe kërcënuese, e mimika kundrejt meje. Është e pafalshme që ekzekutivi sillet në mënyrë fyese. Parlamenti po kthehet në një noter i cili fyhet. Zoti kryetar është detyrimi juaj të merren masat”, tha deputeti Gjoni, ndërsa zv.kryeministri ka shpërthyer në të qeshura.
Truprojat rrethuan foltoren, ndërsa Shalsi qëndronte në këmbë duke qeshur. Më pas kryesuesja e seancës Vasilika Hysi vendosi pushim për disa minuta.
