Kuvendi pritet të vendosë sot për ndryshimet kushtetuese, listat dhe koalicionet.
Ndërkohë në sallë, seanca plenare është shoqëruar me tensione.
Deputeti Adriatik Alimadhi ka debatuar me kolegët, ndërsa Gramoz Ruçi i tërhoqi vëmendjen disa herë dhe i kërkoi që të pushojë.
Kujtojmë se pak më herët, gjatë fjalës së tij në foltore, Alimadhi theksoi se disa deputetë opozitarë kanë votuar në emër të kolegëve për ndryshimet kushtetuese:
“Në mbledhjen e përbashkët të Këshillit Legjislativ, kam kërkuar që të shikohen firmat e deputetëve për ndryshimet kushtetuese. Këtë shqetësim juridik, por të rëndësishëm e kam ngritur në mbledhjen e përbashkët.
Do kërkoja që një nga listat ku kanë firmosur deputetët, të na vihej në dispozicion. Shqetësimi është shkelje ligjore.
S’mund të mendoj se një deputet ka firmosur për disa apo në emër të disa deputetëve të tjerë.
Kjo më duket shkelje procedurale. E shoh të pamundur mënyrën se si operohet kur kushtetuta ka një gjithëpërfshirje në gjuhën e saj juridike dhe në rastin konkret kërkohet që 28 deputetët të opozitës parlamentare, kanë firmosur, por unë mendoj se këta deputetë, s’kanë ndërgjegjësim të saktë se për çfarë flitet më saktë për ndryshimet kushtetuese.
I bëj apel zotit Murrizi, se në 25 maj të vitit të kaluar kemi firmosur një dokument për ndryshimet zgjedhore, për një sistem të pastër kombëtar. Do doja që ta shihnit me realizëm, pasi kjo nisëm kushtetuese privon liritë dhe të drejtat”.
