Prokuroria e Posaçme Anti-korrupsion e SPAK, ka marrë sot në pyetje tre persona të tjerë që kanë lidhje me çështjen e tenderit të ushqimeve për të cilin opozita ka kallëzuar penalisht Ministren e Mbrojtjes Olta Xhaçka.
Raportohet se janë pyetur tre anëtarë të Komisionit të Vlerësimit të Ofertave në Ministrinë e Mbrojtjes: Gëzim Jaçe, Ajet Maksuti dhe Erik Feta.
Ata kanë pohuar para prokurorit se e gjithë procedura ka qenë në zbatim të rregulloreve dhe ligjit.
Kujtojmë se Partia Demokratike akuzoi qeverinë dhe ministren Xhaçka se ka abuzuar me tenderin, 1.5 milionë euro të ushqimeve duke ja dhënë atë pa bërë garë një kompanie e cila kishte ndryshuar subjektin e saj vetëm para një jave dhe nuk kishte ekspertizë në këtë fushë.
Të martën SPAK mori në pyetje tre anëtarë të tjerë të Komisionit të Vlerësimit të Ofertave, Ylli Imeri, Dafina Meço dhe Adriatik Dapaj, shkruan “opinion”.
Sipas PD në këtë tender është përdorur procedura sekrete e tenderimit për të fshehur sipas tyre shkeljet e ligjit me qëllim përfitimin nga ana e zyrtarëve të qeverisë. Ministrja Xhaçka i ka mohuar këto akuza publikisht dhe ka deklaruar se është e gatshme të presë hetimin dhe gjykimin e organeve kompetente.
