Deputeti i zgjedhur në qarkun e Fierit, Petro Koçi, është thërritur për të dëshmuar në Strukturën e Posaçme kundër Korrupsionit dhe Krimit të Organizuar. Ai pritet që të dëshmojë lidhur me pretendimet e tij se pushteti lokal është i lidhur me krimin e organizuar.
Prokuroria nisi verifikimet për denoncimet publike të tij, i cili deklaroi se në Fier duart e krimit janë shtrirë mbi financat publike. I shoqëruar nga avokati i tij, deputeti është futur rreth orës 11:00 në zyrat e SPAK, ku edhe do të tregojë për të korruptuarit, që sipas tij kanë abuzuar me tenderat.
Sipas burimeve zyrtare të SPAK, pas këtyre deklarimeve janë duke u kryer verifikime për tenderët dhe menaxhimin e financave publike të Bashkisë, ndërsa sot do të merret dëshmia e Koçit mbi dijeninë dhe informacionet që ka në lidhje me këtë denoncim që bëri.
Kujtojmë këtu se më herët, deputeti i zgjedhur në 25 prill denoncoi se duart e krimit janë shtrirë mbi financat publike të Bashkisë së Fierit. Koçi fliste për tendera publikë në qarkun e Fierit, që fitohen nga trafikantët e drogës.
