“Open Data” prej shumë kohësh kishte pasqyruar me “flamurin e rriskut” disa nga tenderat e zhvilluara nga Ministria e Brendshme dhe Minsitria e Shëndetësisë. Por, çështja e uniformave, edhe pse një çështje e hershme, ka vijuar të ketë gjithnjë dyshime. Kështu, përgjatë periudhës shtator 2013 – gusht 2019 qeveria shqiptare harxhoi rreth 7.8 milion euro për uniformat e policisë, ndërsa tenderi për të cilin u arrestuan sot tetë zyrtarët e Ministrisë së Brendshme ishte një “bum” prej 25 milion eurosh.
Deri në vitin 2013 ka patur hetime për një tender të zhvilluar për blerjen e uniformave në vitin 2010 dhe 2011. Më pas, në vitin 2014 Ministria e Brendshme shpalli një tender me tre faza për uniformat e policisë me vlerë totale 550 mijë euro. Tenderi u realizua dhe Policia mori në dorëzim uniformat e porositura, por në maj kjo kontratë u zgjat sërish duke arritur një marrëveshje me të njëjtat kompani, me negociim paraprak, pra pa garë, kundrejt një vlere 1.6 milion euro.
Në dhjetor 2015 Ministria e Brendshme njoftoi një tjetër tender për uniformat e policisë me vlerë 960 mijë euro, e cila u fitua nga kompania “Marsi-Al”.
Pak muaj pas firmosjes së kontratës, në shkurt 2016, ish-ministri Saimir Tahiri prezantoi uniformat e reja të policisë, por disa muaj më vonë kontrata me “Marsi-Al” u anulua pasi kompania nuk kishte përmbushur detyrimet e përcaktuara në të.
Në shkurt 2017 Ministria e Brendshme hap një tjetër tender për uniformat e Policisë së Shtetit me fond prej 9.5 milion eurosh dhe synimin që kontrata të zgjaste edhe tre vite.
Sërish në gusht 2018, ministri i Brendshëm Fatmir Xhafaj zhvilloi tenderin për uniformat, kësaj radhe me një buxhet rreth 7,5 milion euro. Edhe tenderi në fjalë u anulua dhe ministria nuk dha atëhere asnjë shpjegim.
Pikërisht, këto anulime dhe problematika me tenderët për uniformat që çuan në tenderin gjigant të vitit 2019, fati i të cilit nuk mund të ishte ndryshe nga të parët. Për këtë tender u bënë denoncime nga firma. Madje, siç mësohet nga hetimet, ka qenë pikërisht “Marsi-Al”, që iu pezullua kontrata nga Tahiri në vitin 2016, dhe qëu skualifikuar nga tenderi i vitit 2019, që u ankimua në Komisionin e Prokurimeve Publike për parregullsi në procedura dhe manipulim të dokumenteve të tenderit. Në atë kohë PD bëri denoncim, por ish Ministri Lleshaj akuzoi opozitën për shpifje./Tirana Today
