Teksa gjithë pjesa tjetër e botës po vuan ende efektet e koronavirusit, Kina duket se po e hedh pas krahëve këtë dhe po fillon t’i rikthehet normalitetit.
Provinca e Hubeit në Kinë njoftoi sot se duke filluar nga 6 maji, mund të kthehen në shkollë nxënësit e viteve të fundit, që do të përballen edhe me provimet.
Kjo provincë e Wuhan-it ishte vendi më i prekur nga COVID-19 në Kinë. Në këtë vend shkollat janë mbyllur që në muajin janar.
Skuadrat e dezinfektimit janë vënë në punë tashmë për të dezinfektuar shkollat fillore dhe ato të mesme në Wuhan. Në zona të tjera të Kinës, shkollat janë hapur gradualisht në javët e fundit. Në Kinë janë hapur gjithashtu edhe 73 atraksione turistike, përfshirë këtu edhe Murin e Madh kinez.
Koronavirusi e pati shpërthimin e tij të parë në Kinë, ku u shënuan mbi 80 mijë raste dhe më shumë se 4 mijë viktima.
Por tashmë Kina renditet si vendi i tetë më i prekur nga COVID-19 në botë, pas SHBA-ve, Italisë, Spanjës, Francës, Mbretërisë së Bashkuar, Gjermanisë dhe Turqisë.
