Kryeministri Edi Rama ka folur në lidhje me rindërtimin që i është bërë Teatrit të Operas dhe Baletit.
Në një intervistë nga salla e re e Teatrit për emisionin “Real Story”, Rama tha se salla e vjetër ka pasur problem të madh akustikën, gjë që tashmë është rregulluar sipas tij.
“E vërteta është që këtu ishin mundësitë për ta bërë këtë rindërtim dhe është kryer një punë spektakolare. Kjo sallë ka pas një problem shumë të madh me akustikën dhe tani ka një akustik fantastike. Në pjesën e pasme ka një skenë superteknologjike, që do bëjë që trupat tona këtu dhe ato që shkëlqejnë nëpër botë, kur të ngjiten në këtë skenë të ndjehen si në Tokio, si në Paris e si kudo në botë.
Ne nuk e kemi përuruar sallën e Teatrit Kombëtar të Operas dhe Baletit. Kjo sallë i jep dinjitet njerëzve të skenës dhe atyre që vijnë për të shijuar skenën, që nuk e kanë pas ata që vinin këtu në kushtet më mizerabël këtu dhe te godina që u shemb tani dhe që u quajt gabimisht Teatri Kombëtar”, tha ai.
Më tej kreu i qeverisë ka folur edhe për çështjen e Teatrit Kombëtar, duke theksuar se godina duhej shembur shumë vite më parë.
Sipas tij, për godinën e Teatrit janë kërkuar riparime urgjente që pas ekspertizës të bërë në vitin 1941.
“Jo nuk kam ndryshuar asnjë mendim. Ai që u shemb nuk mund dhe nuk duhej ruajtur, ai duhej shembur shumë vite më parë. Të gjithë flasin për kulturë, traditë, monument, por nuk dinë historinë e asaj godine, dhe se prej vitit 1941, kur është bërë ekspertiza e parë dhe kur janë kërkuar riparime urgjente, është thënë e stërthënë se çfarë dëshpërimi është ajo që s’është më. Në këtë aspekt jo nuk jam vetëm, po përkundrazi. Mbase më qëlloi mua të isha i vetmi që ta kaloja këtë det në këmbë, me këtë betejë të nisur prej 21 vitesh”, shtoi ai.
