Policia e Shtetit ka përcjellë të dhënat referuar përplasjeve para Teatrit Kombëtar, i cili u shemb gjatë orëve të para të mëngjesit të sotëm. Në rajonin e policisë janë shoqëtuar 37 persona, të cilët tentuan që të pengonin zbatimin e vendimit për prishjen e godinës.
Po kështu, në Spitalin e Traumës, një punonjës policie është duke marrë ndihmë mjekësore, pasi është goditur me sende të forta nga tubuesit.
Policia e Shtetit apelon ndaj qytetarëve dhe drejtuesve politikë, se tubimet apo grumbullimet janë në shkelje të Aktit Normativ, për parandalimin e pandemisë COVID-19.
Njoftimi
Njoftim i Policisë së Shtetit
Me kërkesë nga Inspektoriati i Mbrojtjes se Territorit i Bashkisë Tiranë, forca të Policisë së Shtetit janë në mbështetje të aksionit të nisur që në orët e para të mëngjesit të sotëm për zbatimin e vendimit të Këshillit Bashkiak të Tiranës, për shembjen e godinës së Teatrit Kombëtar, për t’i hapur rrugë projektit të ri për rindërtimin e tij.
Gjatë aksionit në terren janë shoqëruar 37 persona, të cilët kundërshtuan me forcë apo tentuan të pengonin autoritetet në zbatimin e vendimit.
Policia e Shtetit po vijon veprimet procedurale, në bashkëpunim me Prokurorinë.
Duke përfituar nga ky komunikim, Policia e Shtetit kujton qytetarët dhe drejtuesit politikë, se tubimet apo grumbullimet janë në shkelje të Aktit Normativ për parandalimin e pandemisë COVID-19.
Mosrespektimi i distancës sociale rrezikon gjithë përpjekjen disajavore të gjithë qytetarëve, të cilët kanë respektuar me rigorozitet udhëzimet.
Gjithashtu apelojmë fort për këdo që të shmangë përplasjen me forcat e Rendit që janë në krye të detyrës.
Në spitalin e traumës një punonjës policie është duke marrë ndihmë mjekësore, pasi është goditur me sende të forta nga tubuesit.
