Ministrja Elisa Spiropali deklaroi se si opozita parlamentare ashtu edhe ajo joparlamentare kanë ngjashmëri sa i përket sjelljes dhe qëllimeve për Reformën Zgjedhore.
Gjatë fjalës së saj në Kuvend, Spiropali i bëri thirrje opozitës së re që të mos fajësojë as mazhorancën dhe as sistemin. Kjo pasi ishte opozita joparlamentare ajo që i nxori nga partia, i quajti tradhtarë dhe sipas saj aty duhet ta gjejnë fajin.
“Keni dy gjëra të përbashkëta me opozitën jashtëparlamentare. Të ktheni mbrapsht rrotën e historisë dhe mendoni se pakica mund të pengojnë shumicën.
Opozita joparlamentare thotë se e kundërshton për Reformën Zgjedhore, për dy arsye, në fakt po bën pazar. Sepse nuk do depolitizim si dhe do që gjyqtarët pa vetting të hyjë në Kolegjin Zgjedhor. Vjen era myk, dhe do të mbajë sistemin e vjetër të drejtësisë.
Po ju kë sistem doni. Mos hajdeni këtu edhe thoni se sistemi, sistemi demokratik nuk varret nga sistemi por nga implementimi i mirë prej tij.
Nuk mund të fusin në Kolegj Zgjedhor gjyqtarë që më pas nuk mund të vetohen për 4 vite.
Sa i përket Teatrit, ata s’janë artistë por disa politikanë që janë tallur gjithë jetën, edhe më parë me veten e tyre me vendimet. Janë disa korifenj trushpëlarë. 99% e artistëve që i kanë dhënë shpirt kësaj skene do vijojnë të jetojnë aty sepse Teatri shqiptar duhet të jetë dinjitoz.
Opozita joparlamentare do të bëjë pazar për të vijuar me status-quo e partisë së tyre. Ju doni të mbijetoni politikisht. Për këtë fajin nuk e ka mazhoranca por partia që ju ka nxjerrë ju tradhtarë, dhe nuk ju jep asnjë shans që bëtë gjënë e duhur. Ju e mbajtët opozitarizmin. Gjejeni aty problemin jo tek mazhoranca”, tha ajo.
Sa i takon çështjes së Teatrit Kombëtar, ka ardhur edhe reagimi i deputetes Rudina Hajdari. Ajo e cilësoi deklaratën e Spiropalit si të turpshme dhe se duhet ta tërheqë menjëherë, duke iu kërkuar falje atyre.
“Duhet t’iu vijë turp që fyeni artistët. Të isha në vendin tuaj do e tërhiqja atë fjalë dhe do kërkoja falje. Sa i përket sistemit, a e kuptoni që në këtë Parlament nuk bëhet asgjë për shqiptarët, a e kuptoni që Parlamenti është kthyer në pazare vetëm për biznesmenët, me të cilët rrini cdo ditë. Është bërë ky Parlament një lavatriçe e pastrimit të parave. Ndryshimi i sistemit duhet të jetë i atillë, që qytetarët shqiptarë të jenë të përfaqësuar këtu, dhe jo vetëm vullneti i kryetarit tënd”, tha ajo.
