Policia ka arrestuar një 30-vjeçar nga Fieri, pasi kishte shtënë gjatë natës me kallashnikov.
Shtetasi me inicialet D.A., u arrestua 13 orë pas ngjarjes. Policia zbuloi se ai kishte qenë i dehur kur kishte shtënë dhe nuk kishte lënduar njeri.
Pas të shtënave, 30-vjeçari e kishte fshehur armën tip kallashnikov në pyll.
Njoftimi i Policisë
Fier- Policia zbardh ngjarjen e ndodhur në orët e para të datës 11.06.2020 në fshatin Gorishovë.
Kapet dhe arrestohet në flagrancë personi që gjuajti në ajër me armë zjarri.
Sekuestrohet arma me të cilën ka gjuajtur autori.
Sot, rreth orës 01:00, është marrë njoftim se në fshatin Gorishovë janë dëgjuar të shtëna me armë zjarri.
Nga të shtënat nuk ka pasur persona të lënduar.
Menjëherë, në fshatin Gorishovë, kanë shkuar shërbimet e Policisë, të cilët falë veprimeve të shpejta operacionale bënë të mundur kapjen dhe arrestimin në flagrancë të autorit të dyshuar, shtetasit D. A., 30 vjeç, banues në Gorishovë, i cili dyshohet se ka qenë në gjendje të dehur.
Në cilësinë e provës materiale u sekuestrua arma tip kallashnikov, të cilën 30-vjeçari e kishte fshehur në pyll.
Materialet do t’i kalojnë Prokurorisë pranë Gjykatës së Shkallës së Parë Fier, për veprime të mëtejshme procedurale.
