Për shkak të akteve terroriste ndodhur së fundmi, Shqipëria është treguar vigjilente duke marrë menjëherë masat e nevojshme. Vendi ynë, ndodhur në këto kushte, ka rritur nivelin e sigurisë nga jeshile në portokalli. Raportohet se do të ketë shkëmbime në kohë reale me njësitë e anti-terrorit në Europë e me partnerët. Masat e sigurisë janë rritur me agjentë civilë në ambiente publike me prani të madhe njerëzish, në aeroporte, porte dhe pika kufitare.
Masa shtesë sigurie janë marrë edhe në selitë diplomatike në vend. Këto masa sipas burimeve do të jenë deri në fundvit. Aktualisht kanë hyrë në vendin tonë mbi 30 shtetas të huaj, për të cilët ka patur indicie për aktivitete me prirje ekstremiste.
Sulmi terrorist në Vjenë të hënën në mbrëmje, sipas ministrit të Brendshëm austriak, Karl Nehammer i faturohet të paktën një terroristi islamist. “Nuk përjashtojmë që ka edhe atentatorë të tjerë”, tha Nehammer.
Atentatori, të cilin policia arriti ta eliminojë ishte simpatizant i “Shtetit Islamik”. Sipas Nehammer, ai ka qenë i armatosur me kallashnikov dhe një rrip me lëndë eksplozive fallco, që me sa duket donte të përhapte panik.
