Presidenti i Serbisë, Aleksandër Vuçiç bëri dje një deklaratë të fortë lidhur me operacionin në veri të Kosovës, teksa urdhëroi që ushtria të jetë në gatishmëri për të ndërhyrë.
Megjithatë, pak orë pas kësaj deklarate, duket se presidenti serb është penduar duke e modifikuar disi atë që kishte thënë.
Vuçiç tha se nuk e kishte fjalën për një ndërhyrje ushtarake, por për të mbrojtur popullin serb në Kosovë.
“Nuk thashë se Serbia do të ndërhyjë ushtarakisht, thashë se Serbia është e gatshme të mbrojë popullin e saj. Të mos shtohen fjalë që nuk i kam thënë, nuk do të luftojmë, mbajmë paqen me çdo kusht dhe kjo është shumë e rëndësishme, nëse dikush mendon se mund të bëjë një masakër kundër popullit tonë, nuk përmenda asnjë ndërhyrje, ju i përmendët ato”, u përgjigj Vuçiç.
Më tej lideri serb ka shtuar se tashmë do të kenë sjellje tjetër sa i takon dialogut me Kosovën.
“Do të kemi sjellje tjetër ndaj dialoguesve shqiptarë dhe ndaj atyre të cilët në fillim s’u lajmëruan (në telefon). Nisën të kujtohen kur e kuptuan se qëllimi ynë për të mbrojtur popullin tonë ishte serioz”, shtoi më pas Vuçiçi.
