Zëdhënësi i Presidentit, Tedi Blushi, njofton se Meta ka pritur në një takim kryedemokratin Basha, ku e njohu me “skandalet e fundit anti-kushtetuese dhe përpjekjet e Rilindjes për grusht shteti”. Duke qëndruar në të njëjtën linjë, Kreu i Shtetit i ka kërkuar kreut të PD-së, që të informonte edhe drejtuesit e partive të tjera opozitare, lidhur me këto shkelje.
Në komentin e shpërdarë në Facebook, Meta ia ka bërë të qartë Bashës se do të bëjë çdo gjë për të ndaluar dhe për të shpartalluar grushtin e shtetit, duke i dhënë përgjigjen më shembullore që meriton.
Njoftimi
Presidenti i Republikës Sh.T.Z Ilir Meta thirri sot në një takim Kryetarin e Partisë Demokratike, z.Lulzim Basha.
Presidenti Meta e njohu z.Basha me skandalet e fundit anti-kushtetuese dhe përpjekjet e Rilindjes për grusht shteti, dhe i kërkoi kryetarit të PD-së që të informonte edhe drejtuesit e partive të tjera opozitare.
Presidenti Meta bëri të qartë se do të bëjë çdo gjë për të ndaluar dhe për të shpartalluar grushtin e shtetit, duke i dhënë përgjigjen më shembullore që meriton.
Një ditë më parë, Presidenti i Republikës Ilir Meta, bëri një paralajmërim të fortë në intervistën e dhënë për emisionin “Open”. Ai paralajmëroi se mund të shpërndajë Parlamentin, nëse mazhoranca do të shkojë drejt shkarkimit të tij.
