Një çift të moshuarish, të cilët jetonin vetëm pasi fëmijët i kishin në Greqi, janë dhunuar brenda banesës së tyre në lagjen 15, në Spitallë të Durrësit. Ata janë dërguar në spitalin e Traumës.
Burime nga grupi hetimor bëjnë me dije se një person i ka goditur në kokë të dy të moshuarit.
Nga hetimet e kryera rezulton se autori nuk ka grabitur asgjë. Dyshimet janë që autori mund të ketë konflikt me familjarët, ose fëmijët e çiftit.
Policia po heton pistën e një konflikti familjar, por nuk përjashtohet pista e ngatërrimit të shënjestrës. Sipas të dhënave, të moshuarit nuk rezultojnë me konflikte në lagje.
Ndërkohë, policia tha se nuk i mori dot në pyetje, pasi ishin të traumatizuar dhe nuk flisnin dot.
