Fatos Nano, lideri historik i të majtës dhe një nga figurat qëndrore të skenës politike shqiptare, spikati edhe falë shprehjeve vizionare. Një ndër to ishte edhe; “Të lëshojmë pushtet, për të bërë shtet”. E thënë më ndryshe; të lëshojmë pushtet për hir të shtetit. Kjo gjetje interesante është ‘përqafuar’ sot nga LSI-ja, ku e nxori përsëri në qarkullim nga sëndukët e mykur të qeverisjes.
Mbetur me shpresën për gjetjen e një konsensusi për të miratuar disa projektligje, siç është edhe ai për Magjistraturën, si një nga kushtet që duhet të plotësojë vendi për në BE, vjen një reagim i fortë nga LSI-ja.
Është zëvendëskryetari i LSI-së, Luan Rama, ku përmes një deklarate për mediat, para Kuvendit, shigjetoi maxhorancën për qëndrimet e kësaj të fundit.
Në ‘valle’ futi edhe personazhe me mjaft peshë të PS-së. Ai solli në vëmendje një shprehje të ish-kryetarit të selisë rozë, Fatos Nanos. ‘Të lëshojmë pushtet, për të bërë shtet’, ishte një nga shprehjet e Nanos, që sipas Luan Ramës, sot nga PS është kthyer; ‘të shkatërrojmë shtetin, për të forcuar pushtetin’.
“Mesazhi i 22 korrikut i vitit 2016 që me konsensus miratuam ndryshimet kushtetuese, është logjika dhe rruga që duhet të ecin faktorët politikë, për të lënë mënjanë interesat.
Në Partinë Socialiste, kur kam qenë anëtar i PS, ka pasur një kredo parimore të artikuluar nga kryetari Fatos Nano, i cili thoshte; “Të lëshojmë pushtet, për të bërë shtet”. Këta të sotmit në fakt po shkatërrojnë shtetin, për të forcuar pushtetin”, tha Luan Rama.
Referuar thënies së Nanos, qytetari shqiptar mori mesazhin se më në fund duhen kthyer sytë nga shteti. E ndërsa sot, Luan Rama ka vënë ‘dorën mbi plagë’.
