“Të Kuqtë” përmbysen nga Kukësi, Vllaznia shkëputet nga Teuta (Video)

Dy sfidat mbyllëse të javës së 20, kanë dhuruar spektakël dhe gola. Në “Selman Stërmasi” është zhvilluar një supersfidë, ku Kukësi ka përmbysur Partizanin dhe ka mbrojtur vendin e tretë në klasifikim. Ndërsa në Shkodër, Vllaznia ka mposhtur Teutën dhe e ka zhytur në vallen e mbijetesës.

Kukësi ka triumfuar në kryeqytet duke shkuar kështu në kutoën e 32 pikëve, për të rimarrë vendin e tretë në klasifikim. Pjesa e parë ishte e barabartë për të dyja ekipet deri në fundin e saj, ku është mbrojtësi boshnjak, Gojkoviç që gjen rrugën e rrjetës falë një gabimi të lojtarëve verilindorë. Pjesa e dytë ishte në të njëjtat nivele deri në momentin që Partizani ndëshkohet me karton të kuq, që rezultoi fatal për ndeshjen, Culum ndëshkohet me karton të kuq në minutën e 65’. Më pas në harkun e 4’ minutave, Kuksi përmbys rezultatin me gola të Sidrit Gurit dhe Hoxhës.

Të kuqtë kanë gjetur rrugën drejt rrjetës, por arbitri anësor ka vendosur për pozicion jashtë loje të Bardhit, duke lënë në fuqi të paprekur avantazhin e Kukësit. Në avantazh, sikurse dhe në epërsi numerike, kampionët e kanë patur të lehtë të ruajnë fitoren, madje dhe ta thellojnë atë deri në vërshëllimën e fundit të arbitrit.

Bakaj është ndëshkuar me karton të kuq në mintën e 90’, por vetëm pasi ishte zëvendësuar, për sjellje jo korrekte ndaj tifozerisë. Në minutën e fundit shtesë Guri ka thelluar epërsinë e kampionëve në 1-3 falë një inkursioni perfekt në kundrasulm ndaj të kuqve.

Ndërkohë në Shkodër Vllaznia ka hedhur një hap të madh drejt shpëtimit, pasi ka mundur në shtëpi skuadrën e Teutës, në një përballje direkte për mbijetesë. Kanë qenë vendasit që nuk kanë vonuar të kalojnë në avantazh falë një eurogoli të Çinarit, i cili në të 27’ ka realizuar nga jashtë zone me një gjuajtje të fuqishme.

Në të 35’ Malota ka dyfishuar shifrat për kuqeblutë, duke konkretizuar me gol daljen e tij nga mbrojtja dhe krosimin e shërbyer nga goditja e këndit. Të pafuqishëm kanë qenë durrsakët për të reaguar, madje duke shpërdoruar edhe ato raste të krijuara gjatë pjesës së dytë. Pas javës së 20-të Vllaznia mbetet në vendin e 8-të, edhe pse shkon në kuotën e 21 pikëve, duke rritur në 4 pikë epërsinë ndaj Teutës së vendit të 9-të, që  ndjen shumë pranë rrezikun e rënies nga kategoria.