Nga: Mero Baze
Një militant zjarrvënës nga ata që kanë tentuar të djegin shkollat para 30 Qershorit, u përball sot me Rudina Hajdarin, në të njëjtën shkollë në Shkodër, i përgatitur që të sulmojë “armikun” më të ri të Lulzim Bashës.
Me një fjalor agresiv, nga ata që duan të flasin por të mos dëgjojnë, dhe mbi të gjitha të mos ballafaqohen, militanti ishte një produkt origjinal i betejës reale të Lulzim Bashës në këto ditë. Angazhimi kryesor i Lulzim Bashës nuk është të marrë pushtetin, por të jetë i sigurtë se nuk i marrin opozitën.
E gjithë fryma e veprimeve të tij të fundit, përfshi dhe zbythjen për t’u ulur në tryezën për reformën elektorale, ka vetëm një kusht i cili lexohet në çdo veprim, dhe ai ka të bëjë me hipotekën e opozitës.
Ai është gati të bëjë çfarë të dojë Edi Rama me kusht që pushteti të njohë për opozitë, vetëm Lulzim Bashën. Ai është gati të bëjë çfarë të dojë OSBE apo BE dhe SHBA, por me kusht që të njohin për opozitë vetëm atë. Ai është gati të tërhiqet nga ideja e revolucionit permanenet, por palët duhet t’i njohin atij të drejtën e opozitës.
Të gjitha kërkesat e tij fokusohen vetëm tek nevoja për të bashkëpunuar me armikun e jashtëm, kundër “armikut të brendshëm”. Kërkesa e tij në tryezën e OSBE ishte ilustrim i këtij makthi, ku ai e donte fushën të pastër pa kundërshtarët e vet nëpër këmbë.
Dhe duket se të tillë konsideron çdokënd që i ka dalë nga rreshti. PD e Shkodrës ka sulmuar në rrjete sociale dhe me zëra publik drejtues të Universitetit në Shkodër që i kanë dhënë një çmim Topallit. Kamikazi i Bashës, i turret vajzës Azem Hajdarit dhe i thotë ti nuk e ke njohur Azemin, se ai ka qenë demokrat…dhe mendo që ky tipi ka lind pas vdekjes Azemit, dhe as në video se ka parë, njësoj si Lulzim Basha. Falë zotit që ajo vajza përballë tij, ishte Rudina Hajdari, e cila e çarmatosi duke i dhënë mikrofonin dhe ai iku si frikacak nga përballja, se po të ishte Azemi mund ta hante dhe kokës atë mikrofonin.
E njëjta gjë është dhe me qëndrimin ndaj Murrizit, Patozit, madje dhe ndaj gazetarëve që e mbështesin PD-në dhe janë kritikë të ashpër të qeverisë, por kanë rezerva për Lulzim Bashën.
Pra i gjithë shqetësimi për Bashën, nuk është si mund të mundet pushteti, si mund të sulmohet qeveria, si mund t’i bëhet e pasigurtë e ardhmja e qeverisë, por si të sigurohet Basha, se nuk i marrin opozitën. Madje, në këtë spirale ka arritur të fusë, duke e poshtëruar edhe Berishën, i cili duket se më shumë hall ka mos i marrin opozitën Bashës, se sa mos i marrin pushtetin Ramës.
Nuk më duket se Rama ka gjë kundër kësaj strategjie. Dhe ai mund t’i garantojë që nuk ua merr njeri opozitën. Madje mund të jetë gati dhe të paguajë për këtë.
