Kryeministri Edi Rama gjatë një takimi me banorët e Rrëshenit, ka folur edhe për statusin e minatorit. Ndërsa u ka dhënë fjalën qytetarëve, një grua i është drejtuar duke i thënë se gjatë fjalës së tij nuk e preku këtë çështje, por ajo, si grua e një minatori, kërkon të dije se çfarë do të behët me statusin.
“Unë jam grua minatori, dhe ju nuk e përmendët këtë çështje, por dua të di çfarë do bëhet me statusin e minatorit. Ia kam dhënë prej 30 vitesh PS votën, jam pa parti, por me bindje të majta. I kam dhënë 100 vota, ia kam dhënë PS, t’i deklaroj… tani dua të di për statusin e minatorit”, i ka thënë ajo kryeministrit.
“Paske besim të madh tek kushërinjtë”, i është përgjigjur Rama me batutë ndërsa ka sqaruar edhe statusin e minatorit.
“Unë nuk i preka të gjitha se duhej të rrinim këtu deri nesër, por statusin e minatorit ne jemi duke e përfunduar. Është në diskutim me grupet e interesit dhe do të shkojë së shpejti në parlament, dhe do të bëjmë aq sa kemi mundësi. Të gjithë kanë të drejtë për atë që kërkojnë, por ama këto janë mundësitë.
Edhe studentët dolën në protestë dhe kërkuan përgjysmim tarifash, po të kishin dalë para dy vitesh nuk do ua bënim sepse jo se nuk ishte e drejtë por sepse nuk kishim mundësi”, është shprehur Rama.
