Ish-Presidenti Ilir Meta ka reaguar menjëherë në lidhje me një dokument të Autoritetit të Dosjeve, ku thuhet se rezulton si bashkëpunëtor i Sigurimit të Shtetit. Në konferencën për mediat, Meta tha se ka qenë dhe do të jetë gjithmonë i pastër në ndërgjegje. Teksa sulmoi kryetaren e Kuvendit, Lindita Nikolla, duke iu referuar asaj si “pulë”, ai shigjetoi kryeministrin Rama në bashkëpunim me Lulzim Bashën, duke e cilësuar si “Autoriteti i 17 majit”. Ish-Presidenti paralajmëroi se ka e-maile nga New York-u, madje me emra, por duke mos dhënë më shumë detaje se për çfarë bëhet fjalë.
“Autoriteti ti publikojë, kush i ka penguar?! Sot ta bëjë, pse do të angazhohet Parlamenti. Të filloj unë me e-mailet nga New York-u që i kam me emra thua ti. Parlamenti s’ka nevojë të lodhet fare. Duan të devijojnë vëmendjen. Edhe këtë çështjen me Autoritetin të dy e kanë bërë bashkë, është “Autoriteti i 17 majit” ky. Kujtojnë se do ta pengojnë Ilir Metën nga Revolucioni anti korrupsion”, deklaroi ai.
