Autoritetet në Haiti, deklaruan se një grup prej 28 personash, mesh tyre edhe ish-ushtarakë nga Kolumbia, janë përgjegjës për ekzekutimin e Presidentit Jovenel Moise. Policia ka bërë të mundur arrestimin e 17 prej të akuzuarve, 3 janë vrarë dhe 8 të tjerë janë shpallur në kërkim.
Ndërkohë, media britanike BBC, ka shpërndarë pamjet ku tregohet se si po trajtohen 17 të arrestuarit. Në videon e publikuar, ata shihen të dhunuar, me rroba të shqyer e duke qëndruar ulur në radhë.
Krahas arrestimit, Policia ka sekuestruar arsenal armësh dhe pasaportash, që i përkisnin personave të arrestuar. Atyre u janë gjetur edhe dollarë amerikanë, libra personal të presidentit si dhe serveri i kamerës së shtëpisë ku ndodhi krimi.
Sipas raportimeve, qeveria e Kolumbisë ka konfirmuar se të paktën gjashtë nga të dyshuarit ishin ish-ushtarë të saj, ndërsa kanë premtuar se do të ndihmojnë Haitin në përpjekjet e saj për t’i shkuar deri në fund zbardhjes së kësaj ngjarjeje të rëndë.
Kush është në krye të vendit?
Atentati ka krijuar konfuzion se kush duhet të drejtojë Haitin, të paktën derisa të mbahen zgjedhjet. Rregullat në kushtetutë janë ngatërruar nga fakti se aktualisht nuk ka Asamble Kombëtare.
Ndryshimet në kushtetutë, të cilat nuk pranohen nga të gjithë, sugjerojnë që Kryeministri tani duhet të drejtojë vendin, por legjitimiteti i Claude Joseph është i diskutueshëm. Një politikan tjetër, Ariel Henry, ishte emëruar si Kryeministri i ri pak para vrasjes së Presidentit, por ende nuk ishte betuar.
Kombet e Bashkuara thonë se Joseph duhet të mbetet në krye derisa të mbahen zgjedhjet më vonë këtë vit.
Ai ka thënë se nuk do të qëndrojë në krye të shtetit. “Unë nuk jam këtu për të qëndruar shumë gjatë. Ne kemi nevojë për të mbajtur zgjedhje. Unë nuk kam një axhendë personale,” i tha ai BBC.
Haiti ka qenë prej kohësh i munduar nga paqëndrueshmëria politike dhe ekonomike, dhe së fundmi nga lufta e shtuar e bandave.
