Tashmë është e konfirmuar zyrtarisht se Madonna do të performojë në Eurovizion. Këngëtarja ka nënshkruar të martën një marrëveshje për të performuar në finalen e Eurovizionit, që do mbahet më 18 maj. Në konkursin e Eurovizionit marrin pjesë këngëtarë nga më shumë se 40 vende, por në finale do arrijnë vetëm 26 këngë. Këngëtarja shqiptare Jonida Maliqi do performojë sot, me këngën “Ktheju tokës” .
Vlen të theksohet se kjo marrëveshje vjen pas disa muajsh negociata, ndërsa përflitej edhe për refuzimin nga ana e saj. Këngëtarja arriti në Izrael pasditen e së martës, dhe pati përplasje me The European Broadcasting Union, por më në fund ranë dakord.
“Tani është zyrtare. Pas disa ditëve të tensionuara, kontrata mes Madonnës dhe producentëve të Eurovizion është nënshkruar sot”, kanë njoftuar nga transmetuesi publik izraelit, KAN.
Sipas Jerusalem Post, Madonna do të performojë dy këngë në mbrëmjen e së shtunës, një nga albumi i saj i ri Madame X, dhe një këngë të vjetër si “Like a Prayer” e vitit 1989.
