Deri tani rrugët e preferuara për të nxjerrë drogën nga Shqipëria kanë qenë Italia dhe Greqia. Por trafikantët kanë gjetur një rrugëkalim të ri që është zbuluar nga policia. Për Kosovën është hera e parë që kapet drogë, e cila vjen nga Shqipëria.
Policia e Ferizajt, ka realizuar një operacion kundër trafikimit të substancave narkotike, në të cilin është konfiskuar rreth 825 kg marijuanë, 6 automjete dhe 26 telefona celularë. Në operacion janë arrestuar 12 persona dhe dy të tjerë janë në kërkim. Dy prej të arrestuarve janë maqedonas, ndërsa të tjerët kosovarë.
E gjithë droga e kapur ka ardhur nga Shqipëria, duke përdorur Kosovën si vend transit për të kaluar më pas drejt vendeve perëndimore.
Një pjesë e drogës është kapur në fshatin Sojevë, në një shtëpi të pabanuar, në të cilën policia gjeti 20 tavolina druri, brenda së cilave ishte fshehur marijuana, rreth 500 kg.
