Kreu i PD-së, Lulzim Basha shprehet se suksesi i zbatimit të masave është meritë e qytetarëve dhe jo e qeverisë.
Në një lidhje të drejtpërdrejte me emisionin “Open” në Top Channel, Basha tha se qeveria i ka marrë me vonesë masat, pasi PD ka kërkuar që ato të ndërmerren që në muajin shkurt.
Kryetari i opozitës tha vendi ka dy probleme kryesore: numri i ulët i testimeve dhe vatrat e reja të koronavirusit.
Sipas tij, arsyeja pse kryhen aq pak testime është për të mos treguar dimensionin e vërtetë të infeksionit. Ai shton se qeveria nuk ka asnjë plan dhe asnjë strategji në lidhje me situatën e krijuar.
“Kemi dy probleme madhore. Sa të besueshme janë të dhënat zyrtare. Jemi vendet me testimet më të ulëta në botë. Ka vatra të reja të koronavirusit. Testimet mbahen të ulëta për të mos treguar dimensionin e infeksionit. Problemi kryesor i qeverisë është se nuk ka plan dhe as strategji. Nuk e kemi përdorur ketë situatë për politike, kemi kontribuar në shëndetin e shqiptarëve. Qeveria i mori vonë masat. Kur ne i kërkuam në shkurt, qeveria u tall. Qeveria humbi kohë. Tamponi testues është blerë me katërfish çmimi. U blenë me vonesë”, tha ai.
