Përmes një letëre të hapur të publikuar pasditen e sotme, kryeministri Edi Rama ftoi Lulzim Bashën për t’u ulur së bashku në një dialog pa kushte. Ish-deputeti Dashamir Shehi u shpreh se letra është tallëse dhe se opozita do të bëjë gjithcka në më 30 qershor të mos ketë zgjedhje.
“Ne nuk do marrim pjesë në zgjedhje, do bëjmë çmos që zgjedhjet të mos bëhen. Duke e parë këtë situatë, ai teatri i vjetër i kukullave e ka kuptuar që tani duhet të bëjë një gjest publik dhe për t’ia lënë ngarkesën pjesës tjetër. Nëse do kishte përmendur largimin e vet, do kishte hapur një spirale. Fraza e fundit, ai e quan këtë një krizë të pakuptimtë. Letra është e kuruar dhe është pak tallëse, ka pak Konicë këtu. Se e imiton, se i mendon njerëzit budallenj”, deklaroi në “Opinion” ish-deputeti.
Po a duhet ta pranojë opozita këtë ofertë?
“Nëse zoti Basha do ta pranojë, le ta pranojë! Është puna e tij. Të gjithë këto tallje që ka bëre Rama këtë radhë i ka hedhur me letër. Kjo është tallje e madhe, tallje me shkrim. Pjesa opozitare po besoi këtë letër ne vëmë në dyshim reputacionin tonë që kemi ndërtuar në gjithë këtë kohë. Unë nuk shikoj asnjë shpresë tek kjo letër. Nuk merr asnjë kosto PD, nëse i thotë jo”, u shpreh Shehi.
