Nga: Veton Surroi
…si tallja me veten
1.
Kam një shtytje, jo shumë të shpjegueshme, që çdo herë që në temën e shkrimit është emri i Behgjet Pacollit e çon shkrimit tim jashtë zhanrit të gazetarisë. Shtytja çon nga letërsia, aty ku ky personazh duket sikur banon, dhe duke e braktisur atë hapësirë vjen e na viziton në përditshmërinë tonë të realitetit, çfarë është apo çfarë është i dënuar të jetë.
Është aq letrar, sa e paramendoja të mbërrinte në kufirin e Kosovës-cilindo kufi, tokësor apo ajror- dhe të deklaronte në thellësinë e sinqeritetit dhe të përulësisë së tij arsyet për hyrjen në vend:
– Я депутат, я люблю Косово.
(Unë jam deputet, unë e dua Kosovën- via Google Translate).
Është aq letrar, sa autoritetet e Kosovës t’i thonë se po zbriti në Prishtinë shkon në karantinë. Është aq letrar, saqë kur e kërkon ndihmën e ambasadorit gjerman në Twitter ai i thotë se nuk e di si është puna e hyrjes në Kosovë, ngase ai dhe stafi i tij janë duke shërbyer në këtë vend pandërprerë prej vendosjes së masave të jashtëzakonshme shëndetësore në mars dhe nuk kanë dalë jashtë vendit ku shërbejnë. Është aq letrar, sa fluturon për në Tiranë dhe shkakton një mister tjerët letrar: a thua ku mund të gjendet B.Pacolli?
Dhe është aq letrar, sa të shkaktojë një prej thrillerave më simpatikë të kohës sonë, me një prekje të lehtë humori çfarë e përcjell personazhin B.Pacolli.
2.
Thrilleri:
B.Pacolli mbërrin në Tiranë. Duhet të shkojë në Prishtinë, dhe këtë e kupton ministri në detyrë i Punëve të Jashtme i Shqipërisë, Gent Cakaj. Që të dy e kuptojnë se pas dy muajsh të zhdukjes nga publiku diçka e madhe i detyron të kthehen prapa. E kuptojnë që të dytë se kanë qëndruar në ngrohtësinë e fshehtësisë për këta dy muaj, por duhet të dalin, qoftë përkohësisht, për një kauzë të madhe. Kauza është votimi për një qeveri të re, kështu u është thënë nga shefat a shefi i tyre në Prishtinë. Prania fizike e Pacollit është e domosdoshme për të siguruar shumicën.
Dilemën a do të niset me helikopter apo jo për në kufi të Kosovës e zgjidh Hashim Thaçi. Thotë se do të shkojë deri në Rreps për qejf dhe se do të kthehet nga tuneli i Kalimashit me qejf e me Pacollin në ulësen e prapme. /Koha Ditore
