Nga: Mustafa Nano
Pas largimit të amerikanëve prej Afganistanit, talibanët janë duke i rimarrë qytetet një e nga një. Sot morën Ghazni-n, një qytet të rëndësishëm në rrugën drejt Kabulit. Është e sigurt që edhe Kabuli do të bjerë shumë shpejt në dorë të tyre. Sepse talibanët kanë motivacione të mëdha.
Luftojnë për ide në të cilat besojnë. Luftojnë për Sherihatin, luftojnë kundër të pafeve, luftojnë kundër “degjenerimit” perëndimor, luftojnë që gratë të mbeten të mbuluara etj., etj.
Ndërsa pala tjetër, afganët e tjerë, janë duke luftuar për gjëra, të cilat nuk kanë lidhje me ta, siç janë shteti i së drejtës, demokracia, liria e fjalës, të drejtat e njeriut. Kjo është një ndeshje e pabarabartë, fundi i së cilës është i ditur. Afganistani u përket talibanëve…
…Në nivele të tjera, e njëjta gjë ndodh kudo nëpër botë. E njëjta gjë po ndodh edhe në Shqipëri, ku një takëm njerëzish, që nuk kanë ndonjë ndryshim thelbësor nga talibanët afganë, janë duke fituar terren gjithnjë e më shumë. Jo me armë, por me mjete të tjera.
Ja, shikojini se ç’bëjnë në rrjetet sociale. Janë futur në profilin e shumë njerëzve (edhe timin, sigurisht) dhe nuk lënë gjë pa thënë.
Sharje, fyerje, shpifje, kanosje. Duan të na mposhtin neve që i përkasim palës tjetër. Do t’ia dalin? Nuk është çudi që po. Janë po njësoj trushpëlarë e me motivime gjithashtu të forta.
Ok…, nëse ky vend është i thënë që t’u përkasë atyre, ashtu u bëftë! Por deri atëherë unë do të doja që “talibanët” (këta që nuk merren me idetë që shprehen, por baltosin e denigrojnë personin që i shpreh) tanë të na linin të qetë në këto strofullat tona, përfshirë edhe faqet tona në “Facebook”, të cilat i kemi hapur për të biseduar e diskutuar me të ngjashmit tanë.
Hej, talibanë…! Largohuni nga faqja ime e “Facebook”-ut! Unë nuk dua të kem të bëj me ju. Bëhuni def! Pirdhuni!
*Reagimi vjen pas sulmeve e fyerjeve që i bënë gazetarit Nano për qëndrimet e tij mbi debatin për ardhjen e këngëtarit serb Bregoviç në Shqipëri
