Besojmë që ju të gjithë keni dëgjuar për masat që ka marrë Suedia për t’u mbrojtur nga koronavirusi.
E themi këtë, pasi, ajo ndryshe nga shumë shtete të tjera të botës vendosi që mos t’i nënshtrohej izolimit total.
Suedia zgjodhi të mbante hapur baret, restorantet, palestrat dhe kinematë ndërkohë një vendim i tillë u cilësua nga opinioni publik si “çmenduri”.
Qeveria suedeze përzgjodhi më shumë rrugën e sensibilizimit të qytetarëve me informacione rreth COVID-19, duke i njohur kësisoj me rreziqet që mund të hasin nëse nuk tregohen të përgjegjshëm e të kujdesshëm.
Ekspertët e mjekësisë në Suedi i përkrahën masat e qeverisë, dhe qartazi taktika “e çmendur” suedeze për të mposhtur koronavirusin duket se po funksionon.
Në një intervistë televizive, epidemiologu suedez Anders Tegnell ka deklaruar se Stokholmi mund të arrijë imunitetin e tufës brenda muajit të ardhshëm.
“Ne jemi ende në nivelin që ishim pak javë më parë. Patëm pikun pak para Pashkëve dhe tani duket se kurba po ulet. Sipas Agjencisë së Shëndetit Publik në Suedi, ka aq shumë persona me imunitet ndaj koronavirusit në Stockholm, sa po ndikon në përhapjen e infeksionit. Sipas përllogaritjeve tona, kjo mund të arrihet plotësisht në Maj”, është shprehur dr. Tegnell.
Aktualisht, në Suedi ka 1.540 të vdekur dhe 14.385 raste të konfirmuara të infektuara.
Megjithatë, disa masa janë marrë, si anulimi i ndeshjeve të futbollit, grupimet me më shumë se 50 njerëz janë të ndaluara e po ashtu universitetet janë mbyllur.
Siç e lexuat edhe në fillim, qeveria suedeze u ka bërë thirrje qytetarëve të tregohen të përgjegjshëm lidhur me distancimin social, por pa i vendosur rregulla strikte.
Tashmë rreth 50% e forcës punëtore suedeze punon nga shtëpia dhe transporti publik është përgjysmuar, ndërkohë që mësohet se Stokholmi ka rreth 70% më pak lëvizje në tërësi.
