Ministri i Tregtisë, Turizmit dhe Telekomunikimit në Qeverinë e Serbisë, Rasim Ljajic ka deklaruar se mallrat nga Serbia vijojnë të tregtohen në Kosovë dhe se po arrijnë përmes rrugëve alternative.
Në një intervistë për Radio Televizionin e Serbisë, Ljajic ka thënë se në çdo vend të Kosovës mund ta hasësh mallra nga Serbia, të cilat mbërrijnë atje përmes rrugëve të ndryshme, pavarësisht tarifës 100% të vendosur nga shteti i Kosovës.
“Ka raste kur gruri ynë shkon në Kroaci, prej atje paketohet dhe transportohet në Kosovë si mall i Kroacisë”, është shprehur Ljajic.
Sipas tij një forme tjetër e plasimit të mallrave nga Serbia në Kosovë, është kur ato dërgohen në Maqedoni, ripaketohen dhe shkojnë në tregun e Kosovës si mallra nga Maqedonia. Ministri serb tha se si pasojë e taksës për tre muaj, Serbia ka humbur 90 milionë euro.
Ai shprehu shqetësimin se humbjet për ekonominë e Serbisë do të jenë edhe më të mëdha nëse bizneset e atjeshme e humbin tregun në Kosovë, ngaqë tashmë, sipas tij janë lajmëruar biznese nga Shqipëria, Sllovenia, Kroacia, Hungaria e tjerë, që duan të përfshihen në këtë treg.
