Kryeministri ende në detyrë i Kosovës, Ramush Haradinaj vijon garën për zgjedhjet e përgjithshme që do të mbahen në këtë vend, pas dorëheqjes së tij pak ditë më parë, para se të paraqitej në Gjykatën e Hagës.
Haradinaj ka komentuar aplikimin e taksës së shtetit kosovar ndaj atij serb, teksa shtoi se me këtë lëvizje, Kosova arriti t’i tregojë vendin Beogradit.
Sipas tij, qytetarët e Kosovës e mbështesin këtë kauzë të forcimit të shtetit dhe demokracisë. Më tej, ai deklaron se qytetari i Kosovës, për herë të parë e kuptoi se çfarë do të thotë t’i bësh bllokadë ekonomike një vendi.
“Qytetari i Kosovës sigurisht për herë të parë e ka parë se si është kur shteti i bën Serbisë bllok, si rasti me taksën 100%, efektet e saj të shpejta, pastaj vendimi për Trepçën, sundimi i ligjit në veri, aty ku ka pasur ndërhyrje ndaj krimit të organizuar dhe shkelësve të ligjit”, tha Haradinaj.
