Kryebashkiaku i Vlorës, Dritan Leli ka reaguar pas publikimit të një fotoje, ku aludohej se ai ishte takuar me Erion Isufajn, i cili është kunati i kryedemorkatit Lulzim Basha.
Leli e ka përgënjeshtruar këtë fakt, teksa tha se është takuar me inxhinierin e pedagogun vlonjat Idlir Dervishi, në oborrin e Akademisë së Arteve. Ky takim është zhvilluar në kohën kur po mbahej Asambleja e Partisë Socialiste.
Ndër të tjera, Leli u shpreh se nuk e ka takuar asnjëherë kunatin e Lulzim Bashës.
”Për të gjithë ata që nxjerrin çfarë duan e nuk shohin çfarë nxjerrin, me gjithë skenarët e qëndisur, më duhet të them se në videon e publikuar nga media, ndërkohë që është duke u zhvilluar Asambleja Kombëtare e Partisë Socialiste, jam duke biseduar me inxhinierin e pedagogun vlonjat Idlir Dervishi, në oborrin e Akademisë së Arteve, pranë Universitetit Politeknik, ku Idliri punon! Kunatin e Lulit, as nuk e kam parë, as nuk e kam takuar ndonjëherë në jetë.”, shkruan Leli në rrjetin social, Facebook.
