Sapo ka përfunduar takimi i kryeministrit Edi Rama me opozitën parlamentare.
Kryetarët e grupeve parlamentare kërkuan takim me Ramën, pas marrëveshjes së arritur mes mazhorancës dhe opozitës jashtë parlamentare në lidhje me Reformën Zgjedhore.
Deputetët e opozitës në parlament janë shprehur se nuk do t’i votojnë ndryshimet në kodin zgjedhor, ndërsa kërkojnë ndryshim të sistemit.
Ndërkohë, pas takimit, Rama bëri me dije se nuk u arrit një konsensus me opozitën parlamentare.
Kreu i Qeverisë theksoi se ndodhet midis dy zjarreve.
Ai pohoi se marrëveshjen për Reformën Zgjedhore nuk mund ta kundërshtojë pasi mazhoranca është palë me të.
“Ne kemi dakordësuar një marrëveshje, nuk është marrëveshja që unë dhe PS do donte, por duke qenë se synimi kryesor i asaj tryeze ishte hapja e dialogut dhe krijimi i mundësive për opozitën jashtëparlamentare, atëherë ne pranuam që mbasi topi shkoi në fushën e Lulzim Bashës dhe nuk po dukej gjëkundi.
Ne duam që opozita parlamentare të kuptojë se ne jemi palë në atë marrëveshje. Ne atë marrëveshje nuk mund ta kundërshtojmë apo ta përmbysim, jemi këtu për ta kaluar. Ne jemi midis dy zjarreve”, tha Rama.
