Kreu i KQZ-së, Ilirjan Celibashi zbuloi detaje nga takimi që zhvilloi me ambasadoren e SHBA-ve në Tiranë, Yuri Kim. Ai tha se ambasadorja Kim përcolli shqetësimin e SHBA-ve për financimet ruse në politikën shqiptare.
“Nga ambasadorja Kim u përcoll shqetësimi i SHBA-së në lidhje me financimet e huaja të politikës shqiptare dhe në mënyrë specifike të financimeve ruse. Nën dritën e fundit të informacioneve që ata disponojnë, përcollën këto shqetësime te aktorët shqiptarë në mënyrë që ata të rrisin vëmendjen në mënyrë që financimet e huaja dhe jo vetëm ato ruse të mos kenë ndikim në politikën shqiptare”.
Sa i përket hetimit nga KQZ-ja të parave të partive politike, Celibashi theksoi se do të duhen ndryshime ligjore, megjithatë diskutimi i sotëm ishte jo me karakter teknik por për të shprehur shqetësimin.
“Natyra e diskutimit ishte një lloj informimi dhe përcjellës së shqetësimit. Nuk u bënë diskutime të karakterit teknik. Ngelet për t’u parë si shqetësim. Mendoj që në vijim do të ketë ndryshime”.
Ne raport thuhet se Rusia ka dhënë fshehurazi mbi 300 milionë dollarë për parti politike dhe kandidatë në dhjetëra vende, që nga viti 2014 mes të cilave dhe Partinë Demokratike të drejtuar në atë periudhë nga Lulzim Basha.
“Në Shqipëri, Rusia i dha rreth gjysmë milioni dollarë Partisë Demokratike në 2017 përmes kompanive fantazëm”, tha burimi i qeverisë amerikane.
Sipas zyrtarit që nuk ka pranuar të identifikohet, raporti ka analizuar financimet e Rusisë “në mbi 24 vende gjatë viteve të fundit në një përpjekje për të manipuluar demokracitë nga brenda. Ne prononcimin e tij, zyrtari amerikan ka paralajmëruar forcat politike që kanë pranuar këto financime, se do t’i ekspozojnë emrat e tyre.
